వైవిధ్యమైన కథలను ఎంచుకోవడంలో 'కింగ్ ఆఫ్ కంటెంట్' అనిపించుకున్న శ్రీ విష్ణు, ఈసారి క్రైమ్ థ్రిల్లర్ జోనర్లో తన అదృష్టాన్ని పరీక్షించుకున్నారు. సుకుమార్ శిష్యుడు హుస్సేన్ షా కిరణ్ దర్శకత్వంలో వచ్చిన ‘మృత్యుంజయ్’ ప్రేక్షకులను ఎంతవరకు మెప్పించిందో రివ్యూలో చూద్దాం.
కథ:
హైదరాబాద్లోని ఒక పత్రికలో మార్కెటింగ్ విభాగంలో పనిచేసే జై (శ్రీ విష్ణు) కు క్రైమ్ రిపోర్టర్ అవ్వాలని కోరిక. కానీ అవకాశం రాదు. దీంతో తన తెలివితేటలతో చనిపోయిన వారి ఇళ్లకు వెళ్లి, వాళ్లలాగే నటిస్తూ కుటుంబ సభ్యులను ఒప్పించి తన పేపర్ కోసం యాడ్స్ సంపాదిస్తుంటాడు. ఈ క్రమంలో నగరంలో జరిగిన రెండు మరణాలు జై అనుమానానికి దారితీస్తాయి. అవి సహజ మరణాలు కావని, ఒక సైకో కిల్లర్ చేసిన హత్యలని జై నమ్ముతాడు. ఏసీపీ సీత (రెబ్బా మోనికా జాన్) ఈ కేసును క్లోజ్ చేసినా, జై మాత్రం వ్యక్తిగతంగా పరిశోధన మొదలుపెడతాడు. అయితే, అసలు ట్విస్ట్ ఏంటంటే.. హీరో ఎవరినైతే పట్టుకోవాలని చూస్తున్నాడో, ఆ కిల్లర్ హీరోనే చంపాలని ప్లాన్ చేస్తుంటాడు. మృత్యువులా వెంటాడుతున్న ఆ కిల్లర్ నుండి జై ఎలా తప్పించుకున్నాడు? చివరకు కిల్లర్ ముసుగుని ఎలా తొలగించాడు? అనేదే ఈ ఉత్కంఠభరిత కథనం.
విశ్లేషణ:
దర్శకుడు హుస్సేన్ షా కిరణ్ స్క్రీన్ప్లే రాయడంలో తన గురువు సుకుమార్ మార్క్ చూపించారు. ముఖ్యంగా విలన్ పాత్రను చాలా పవర్ఫుల్గా డిజైన్ చేశారు.
హీరో మార్కెటింగ్ ట్రిక్స్, సరదా సన్నివేశాలతో సాదాసీదాగా మొదలైనా, హత్యల పరంపర మొదలయ్యాక కథ వేగం పుంజుకుంటుంది.హీరో-విలన్ మధ్య జరిగే మైండ్ గేమ్, ఛేజింగ్ సీన్లు ప్రేక్షకులను సీటు అంచున కూర్చోబెడతాయి. కిల్లర్ ఎవరో తెలిసే క్లైమాక్స్ ట్విస్ట్ ఆకట్టుకుంటుంది.
శ్రీ విష్ణు ఎప్పటిలాగే సహజ సిద్ధమైన నటనతో ఆకట్టుకున్నారు. సినిమాలో కిల్లర్గా నటించిన వీర్ ఆర్యన్ సర్ప్రైజ్ ప్యాకేజీ. తన బాడీ లాంగ్వేజ్, ఇంటెన్స్ లుక్స్తో హీరోకి గట్టి పోటీ ఇచ్చారు. రెబ్బా మోనికా జాన్ పోలీస్ ఆఫీసర్గా తన పరిధి మేరకు రాణించింది. టెక్నికల్ గా చూస్తే బ్యాక్ గ్రౌండ్ స్కోర్ సినిమాకు ప్రాణం పోసింది.
రెగ్యులర్ మాస్ సినిమాలకు భిన్నంగా, కొత్తదనం కోరుకునే ప్రేక్షకులకు ‘మృత్యుంజయ్’ ఒక మంచి ఎంపిక. కొన్ని సాగదీత సీన్లు ఉన్నప్పటికీ, ఓవరాల్గా ఈ క్రైమ్ థ్రిల్లర్ ప్రేక్షకులను థ్రిల్ కి గురి చేస్తుంది.
పంచ్ లైన్: మృత్యువు ఎదురొచ్చినా.. తెలివితేటలతో గెలవొచ్చని చాటిన 'మృత్యుంజయ్'!
రేటింగ్: 3.5
About SocialNewsXYZ
An Indo-American News website. It covers Gossips, Politics, Movies, Technolgy, and Sports News and Photo Galleries and Live Coverage of Events via Youtube. The website is established in 2015 and is owned by AGK FIRE INC.